Država Teksas donijela je rigorozan zakon o zabrani abortusa koji brani pobačaj nakon šeste nedjelje trudnoće, kada mnoge žene ni ne znaju da su trudne. Zakon je osporavan pred sudovima od početka, a u srijedu je njegovu primjenu privremeno obustavio federalni sudija.
Federalni sudija Robert Pitman, kojeg je postavio predsjednik Barack Obama, donio odluku da blokira rigorozan zakon o zabrani abortusa i ocijenio ga kao "grubo kršenje" ustavom zagarantovanog prava na abortus. Poslije odluke sudije Pitmana, mnoge klinike za abortus u Teksasu su otvorene.
Međutim, Peti okružni federalni apelaconi sud je u petak uveče oborio Pitmanovu odluku i ponovo dozvolio da se primjenjuje zakon o zabrani abortusa. Kompletan slučaj je inače pokrenuo Sekretarijat za pravosuđe koji je tužio državu Teksas.
Zakon o zabrani abortusa u Teksasu predviđa da građani tuže klinike koje izvode abortuse, i da, ako spor bude okončan u njihovu korist, dobiju 10.000 dolara. Zakon na taj način ne sprovodi država, nego građani, a iz tog razloga i niži sudovi nisu mogli da blokiraju njegovu primjenu.
Vrhovni sud je isto tako dao zeleno svjetlo za primjenu teksaškog zakona, ali se nije izjasnio o njegovoj usklađenosti sa ustavom.
Pravo na abortus u SAD garantuje presuda Vrhovnog suda iz 1973. Roe protiv Wadea.
