Incident je zasjenio napore koje podržavaju Ujedinjene nacije da se ponovo pokrene isporuka žitarica iz Ukrajine i ublaži nadolazeća globalna kriza gladi koja proističe iz rata, koji sada traje šesti mjesec.
Rusko ministarstvo odbrane saopštilo je da je 40 zatvorenika ubijeno, a 75 ranjeno u napadu na zatvor u gradu Olenivka, na liniji fronta, u dijelu Donjecke pokrajine koji pod kontrolom drže proruski separatisti.
Optužili su Kijev da ga je gađao raketama HIMARS američke proizvodnje, javile su ruske novinske agencije.
Ukrajinske oružane snage negirale su da su izvršile napad i za to okrivile ruske snage, rekavši da je ruska artiljerija gađala zatvor.
"Na ovaj način su ruski okupatori ostvarili svoje zločinačke ciljeve – da optuže Ukrajinu za 'ratne zločine', kao i da sakriju mučenje zatvorenika i pogubljenja", saopštio je generalštab Oružanih snaga Ukrajine.
Rusko ministarstvo odbrane saopštilo je da su u zatvoru smješteni ukrajinski ratni zarobljenici i da je osam zatvorskih radnika također ranjeno. Lider separatista koji podržava Rusija, Denis Pušilin, je rekao da među 193 osobe koje su tamo zadržane nije bilo stranaca.
Na snimku koji je objavio ruski ratni dopisnik vidi se vojno osoblje koje podržava Rusija kako prebira po, kao je ustvrdio, spaljenim ostacima zatvora.
Nezavisno od toga, Ukrajina je saopštila da je najmanje pet osoba poginulo, a sedam ranjeno u ruskom raketnom napadu na jugoistočni grad Nikolajev, riječnu luku nedaleko od Crnog mora, dok je Rusija pucala preko linija fronta u istočnoj i južnoj Ukrajini.
Raketa je pala u blizini stanice javnog prevoza, rekao je regionalni guverner Vitalij Kim na Telegramu.
Rusija, koja poriče da je ciljala civile, nije odmah komentarisala situaciju, a Reuters nije mogao da provjeri izveštaje sa ratišta.
Fokus na jug
U obavještajnim podacima iz Britanije navodi se da je Rusija naredila plaćenicima da drže dijelove linije fronta u Ukrajini - što je znak da joj nedostaje borbene pješadije dok Kijev pojačava kontraofanzivu na jugu.
Veće oslanjanje na borce ruske privatne vojne kompanije Wagner grupe za obavljanje dužnosti na frontu, a ne na njihov uobičajeni rad u specijalnim operacijama, bio bi još jedan znak da je ruska vojska pod stresom šest mjeseci nakon rata u Ukrajini.
Ali britansko ministarstvo odbrane je u ažuriranju navelo da je malo vjerovatno da će Wagnerovi plaćenici nadoknaditi nedostatak redovnih pješadijskih jedinica ili promijeniti smjer ruske invazije.
"Ovo je značajna promjena u odnosu na prethodno zapošljavanje grupe od 2015. godine, kada je obično obavljala misije različite od otvorenih, velikih redovnih ruskih vojnih aktivnosti", saopštilo je ministarstvo.
Wagner i Kremlj nisu odmah bili dostupni za komentar.
Protivnapadi Ukrajine na jugu dolaze dok se Rusija bori za kontrolu nad cijelim industrijalizovanim regionom Donbas na istoku, koji obuhvata provincije Donjeck i Lugansk.
Ruske rakete pogodile Kijev i oblast Černigova
"Niko na svijetu ne ulaže u terorizam više od Rusije", rekao je ukrajinski predsjednik Volodimir Zelenski u svom dnevnom obraćanju u četvrtak.
"Za ovo je zaista potreban pravni odgovor na globalnom nivou. I nema racionalnog razloga zašto do takve reakcije ne bi došlo, posebno u Sjedinjenim Državama", rekao je on.
Zelenski je zahvalio američkim senatorima koji su "jednoglasno odobrili rezoluciju kojom se poziva Stejt department SAD da proglasi Rusiju za državnog sponzora terorizma". Rusija bi se pridružila Kubi, Sjevernoj Koreji, Iranu i Siriji.
Prvi put u posljednjih nekoliko nedjelja, Rusija je u četvrtak lansirala projektile na oblast glavnog grada Ukrajine, Kijeva i sejvernu oblast Černigova, u, kako je Ukrajina navela, odmazdi zbog njenog kontinuiranog otpora invaziji Moskve.
Rusija je napala Kijevsku oblast sa šest projektila ispaljenih iz Crnog mora, pri čemu je ranjeno 15 ljudi, od kojih pet civila, rekao je ukrajinski regionalni guverner.
Ukrajina je saopštila da je oborila jednu od raketa, ali da su moskovske snage pogodile vojni kompleks u selu Ljutiž izvan prijestolnice, uništivši jednu zgradu i oštetivši dve druge.
